செவ்வாய், மார்ச் 08, 2011

காங்கிரஸ்சிடம் தோற்ற கருணாநிதி.


தமிழக மக்கள் விடிய விடிய பல நாடகங்களை பார்த்தவர்கள் தான். பார்க்கும் போதே க்ளைமேக்ஸ் என்னவென்று சொல்லிவிடுவார்கள். ஆனால் அரசியல் களத்தில் தற்போது திமுக நடத்திய நாடகத்தில் க்ளைமேக்ஸ் என்னவென்று தெரியாமல் தடுமாறிக்கொண்டு இருந்தார்கள். நாடக ஆசிரியரான திமுக தலைவரும் முதல்வருமான கருணாநிதி இருந்தார் என்பதால் க்ளைமேக்ஸ் தெரியாமல் இருந்தார்கள். க்ளைமேக்ஸ் வெளியே தெரிந்தபோது ஒட்டுமொத்த மரியாதையும் இழந்து போய்வுள்ளார் கருணாநிதி.

சில வாரங்களாக திமுக-காங்கிரஸ் இடையே சீட் தகராறு நடந்துவந்தது. காங்கிரஸ் அதிகமான சீட்க்கு ஆசைப்படுகிறது. 63 சீட் கேட்பதை ஏற்றுக்கொள்ள முடியாது, அதோடு தமிழகத்திற்க்கு ஒத்துவராத பல கண்டிஷன்களை போடுகின்றனர். இதனால் கூட்டணியில் இருந்து விலகுகிறோம்;. மத்திய அமைச்சர்கள் பதவியை ராஜினாமா செய்துவிட்டு வெளியில் இருந்து ஆதரிக்கிறோம் என நள்ளிரவு அறிக்கை விட்டார்.

7ந்தேதி காலை டெல்லிக்கு பிளைட் ஏறினார்கள் திமுக அமைச்சர்கள் 9 மணிக்கெல்லாம் ராஜினாமா கடிதத்தை தந்துவிடுவார்கள் என தகவல் பரப்பினார்கள். 9…….10…..11 என மணியானதே தவிர அமைச்சர்கள் யாரும் பிரதமரை சந்திக்கவில்லை. பிரதமர் பாத்ரூம் போனார் வரவில்லை. மாலை 6 மணிக்கு தான் வருவார் என்று காரணம் சொன்னார்கள். மாலை 6ம் வந்தது 7……8………என மணியானதே தவிர பிரதமரை இவர்கள் சந்திக்கவேயில்லை.

என்ன ஆனாது இவர்களுக்கு பசி எடுத்து ராஜினாமா கடிதத்தை தின்று விட்டார்களா என மக்கள் பேசிக்கொண்டிருந்த நேரத்தில் காங்கிரஸ் ஒரு நாள் டைம் கேட்டுள்ளது என்றார் துணை முதல்வாரன ஸ்டாலின்.

8ந்தேதி இரவு மத்திய அமைச்சர்களான திமுகவை சேர்ந்த அழகரி, தயாநிதிமாறன்னுடன் காங்கிரஸ் கட்சியின் மத்தியமைச்சர்கள் பிரணாப்முகர்ஜி, குலாம்நபிஆசாத் பேச்சு வார்த்தை நடத்தியதன் விளைவாக 63 சீட்க்கு திமுக ஒத்துக்கொண்டதாக குலாம் செய்தியாளர்களிடம் அறிவித்தார். உடன் அழகரி, தயாநிதிமாறன். அடுத்து கருணாநிதி ஒரு அறிக்கை விட்டார், பாமக ஒதுக்கப்பட்ட இடத்தில் இருந்து 1 தொகுதியை வாங்கி 63 தொகுதி காங்கிரஸ்க்கு தந்து 121 இடங்களில் திமுக போட்டியிடும் என அறிவித்து நாடகத்தை முடிவுக்கு கொண்டு வந்துவிட்டார்.

63 இடம் கேட்கிறார்கள் என அறிக்கை விட்ட கருணாநிதி ஒரு நாடகத்திற்க்கு பின் அதேயிடத்தை தந்துள்ளார். இது மக்கள் எதிர்பார்க்காத முடிவு தான் பள்ளத்தை தோண்டி திமுக அதில் போய் விழுந்துள்ளது. காங்கிரஸ் கட்சியை கழட்டி விட்டபோது மக்கள் மிகப்பெரிய அளவில் தமிழகம் முழுவதும் சந்தோஷப்பட்டார்கள். இலங்கை பிரச்சனையில் காங்கிரஸ்சை பழிவாங்க சரியான சந்தர்ப்பம் என கொண்டாடி மற்றவர்களுடன் சந்தோஷத்தை பறிமாறிக்கொண்டார்கள். அதோடு ஊருக்கு இரண்டு பேர் இல்லாத கட்சி திமுகவை மிரட்டுவதா என மற்ற கட்சியினரும் பேசினார்கள். திமுகவின் முடிவை வரவேற்றார்கள்.


அந்த சந்தோஷம் மறைவதற்க்குள் தமிழக மக்களுக்கு அதிர்ச்சியை தந்துவிட்டார் கருணாநிதி. எந்த பிரச்சனை எப்படியிருந்தாலும் எடுத்த முடிவில் திமுக உறுதியாக இருந்திருந்தால் தனித்து வெல்லும் அளவுக்கு தொண்டர்களும் பணியாற்றியிருப்பார்கள், மக்களும் ஆதரித்துயிருப்பார்கள். அது எல்லாவற்றையும் கெடுத்துக்கொண்டது திமுக.

63 சீட் தந்த முடிவு, சாணக்கியதனம் என வெளியே சொன்னாலும் இந்த முடிவு எதிர் கூட்டணியான அதிமுகவுக்கு சாதகமாக தான் முடியும். 65 ஆண்டுகாலம் அரசியல் வாழ்வில் பல ஏற்ற தாழ்வுகளை திமுகவும், கருணாநிதியும் சந்தித்துள்ளார்கள். அப்போதுயெல்லாம் எடுக்கப்பட்ட முடிவு மக்களிடம் வரவேற்ப்பு பெற்றது. தற்போது எடுத்துள்ள முடிவு வியாபார முடிவு, கொள்கையை கட்சியை அடகு வைக்கப்பட்ட முடிவு என மக்கள் விமர்சிக்க தொடங்கிவிட்டார்கள். அதுமட்டுமல்ல இந்த நாடகத்தில் காங்கிரஸ் வெற்றி பெற்றுள்ளது. கருணாநிதி தனது அரசியல் சாணக்கிய தனத்தில் தோற்றுள்ளார் என்பது எனது கருத்து.

மக்கள் கருத்து முடிவு தேர்தல் களத்தில் தெரியும்.

புதன், மார்ச் 02, 2011

நடிகர் விஜய்யின் பொய் முகம்.


இலங்கை அரசு வெளியிட்டுள்ள செய்தி குறிப்பு அரசியல்வாதியாக புதிய வேஷம் கட்டியுள்ள நடிகர் விஜய்யின் மறுபக்கத்தை வெளிச்சம் போட்டு காட்டிவிட்டது. சில மாதங்களுக்கு முன்னர், என்னை அழிக்க பார்க்கறாங்க, என் படத்தை ஒட விடமாட்டேன்கிறாங்க அதுக்கெல்லாம் முதல்வர் கருணாநிதி குடும்பம் தான் காரணம் என விஜய்யும், அவரின் அப்பா இயக்குநர் எஸ்.ஏ.சியும் கூப்பாடு போட்டார்கள்.

தன் தனிப்பட்ட கோபாதாபம், லாப-நட்டத்துக்கு தனது ரசிகர்கள் மூலம் திமுகவை பழிவாங்க முடிவு செய்த விஜய். அதில் மக்களையும் இணைத்துக்கொள்ள அரசியல் இயக்கம் தொடங்க முடிவு செய்தார். பணம் செலவு ஆக கூடாது ஆன கட்சி நடத்தனும் என ரசிகர்களிடம் சொல்ல பின்னங்கால் பிடறியில் ஓடி பின்வாங்கினார்கள் ரசிக சிகாமணிகள். இதனால் அசரவில்லை விஜய் அன் கோ. பெரியதாக ரியாக்ஷன் இல்லை என்றதும் ஜெயலலிதாவை போய் சந்தித்;தார் எஸ்.ஏ.சி. ஜெவோ, திமுகவுக்கு எதிரா பேசுங்க என கீ கொடுத்து அனுப்பியதன் விளைவு புறப்பட்டார்கள் அப்பாவும் மகனும்.

என் தனிப்பட்ட லாபத்துக்காக தான் இயக்கம் தொடங்கறன், திமுகவை எதிர்க்கறன், ஜெ வை ஆதரிக்கறன் என சொல்ல முடியாது என்பதால் தமிழக மீனவர்களை கொல்லும் இலங்கை இராணுவத்தை கண்டித்தும், அதற்க்கு ஒத்து ஊதும் மாநில அரசை கண்டித்து நாகையில் கூட்டம் நடத்தி இலங்கை இராணுவத்தை கண்டித்து, சினிமாவில் பேசுவதை போல வீரவேசமாக பேசிவிட்டு சென்னை வந்துவிட்டார். பின்னாலயே அறிக்கை வாயிலாக விஜய்யின் முகத்தை கிழித்துவிட்டது இலங்கை அரசாங்கம். தமிழர்கள் மேல் உண்மையில் விஜய்க்கு அக்கறையில்லை. அப்படியிருந்திருந்தால் தென்னிந்திய சினிமா உலகில், தமிழகத்தில் கேரளா நடிகையும், இலங்கைக்கு மிக வேண்டப்பட்டவருமான அசின்க்கு எதிர்ப்பு வந்தபோது எதைப்பற்றியும் கவலைப்படாமல் தனது காவலன் படத்தில் நடிக்க வைத்தார். அவரின் தமிழ் பற்று இதுதான் அதனால் அவர் பேச்சை நாங்கள் பெருசாக எடுத்துக்கொள்ளவில்லை.

விஜய் தமிழ் மக்களுக்கு பாதுகாப்பானவர் என்பது பொய் என்பதை செவிட்டில் அறைவதை போல வெளிச்சம் போட்டு காட்டியுள்ளது அந்த அறிக்கை. இந்த அறிக்கைக்கு பின்னால் இருக்கும் அரசியல் நமக்கு தேவையில்லை. ஆனால், அறிக்கை சாராம்சம் உண்மை தானே. தமிழர்களை அழித்த இலங்கை சிங்கள அரசியல்வாதிகளுடன் கும்மாளம் போட்ட நடிகை அசின்க்கு தமிழகத்தில் பல இயக்கங்கள் எதிர்ப்பு தெரிவித்தபோது காவலன் படத்தில் அசின் தான் எனக்கு ஜோடியா வேணும் என பிடிவாதமாக இருந்து அவரை தன்னுடன் நடிக்க வைத்து போராடிய இயக்கங்கள் முகத்தில் கரியை பூசியவர் தமிழர்களின் உரிமைக்காக குரல் கொடுக்கிறேன் என்பதை எப்படி ஏற்றுக்கொள்ள முடியும்.

தமிழகத்தை விட்டே துரத்த வேண்டும் என தமிழ் உணர்வாளர்களால் குறிப்பிடப்படும் கோல்மால் கட்சியான காங்கிரஸ்சுடன் இணைய பேச்சு வார்த்தை நடத்திய நடிகர் விஜய்யை அப்போதே புறம் தள்ளியிருக்க வேண்டும். செய்யாமல் விட்டதன் விளைவு இன்று தமிழர்களுக்காக போராடுகிறேன் என நாடகம் ஆடுகிறார்.

விஜய்யின் உண்மை முகத்தை சிங்கள அரசு புரிந்து வைத்துள்ளது. தமிழர்கள் புரிந்துக்கொள்ள வேண்டும்.

திங்கள், பிப்ரவரி 28, 2011

உலக அரங்கில் மரியாதையை இழக்கும் இந்தியா.


அமெரிக்காவில் கல்வி கற்க போன இந்திய மாணவர்களின் கால்களில் ரேடியோ டிரான்ஸ்மீட்டர் கட்டப்பட்டு மிருகங்களை போல அவர்கள் கண்காணிக்கப்படுகிறார்கள் என நம் தேசத்தின் வட இந்திய மீடியாக்களும், வட மாநில அரசியல் கட்சியை சார்ந்தவர்களும் தினம் தினம் குரல் கொடுத்து பரபரப்பை கிளப்பிவுடன் இந்தியாவின் வெளியுறவுத்துறை அமைச்சர் எஸ்.எம்.கிருஷ்ணா அமெரிக்கா அரசை மென்மையாக கண்டித்தார். அமெரிக்கா கூலாக, சட்டத்திற்க்கு புறம்மாக விசா பெற்று அமெரிக்காவில் தங்கி படிப்பவர்கள் கால்களிலேயே டிரான்ஸ் மீட்டர் பொருத்தியுள்ளோம். படிக்கும் இளைஞர்கள் என்பதாலே அவர்களை கைது செய்து, நாடு கடத்தாமல் கண்காணிப்பில் வைத்துள்ளோம். இது எங்களது நாட்டு பாதுகாப்புக்காக நாங்கள் செய்யும் நடைமுறை என பதிலாளித்து விட்டார்கள்.

அமெரிக்கா பாதுகாப்பு காரணம் காட்டி இந்தியர்களை அவமானப்படுத்துவது முதல் முறையல்ல. கணக்கிலடங்காத வகையில் இந்தியாவின் முகத்தில் கறியை பூசி விட்டது. ஆனால் நம் ஆட்சியாளர்கள் கொஞ்சமா தானே பட்டுயிருக்கு என துடைத்துக்கொண்டு அடுத்த வேலை பார்க்க போய்விடுகிறார்கள். நம்மையும் அப்படியே இருக்க சொல்கிறார்கள். ஆனால் வட இந்தியாவில் அரசியல் கட்சியின் அமைப்புகள், வட இந்திய மீடியாக்கள் இந்தியர்களை அவமானப்படுத்தி விட்டார்கள் என அமெரிக்க தூதரகத்தை முற்றுகையிட்டு ஆர்ப்பாட்டம் செய்து வருகின்றனர்.


இது யாரால் ஏற்பட்டது. இந்தியாவில் படிக்க சரியான வசதியில்லை, வாய்ப்பில்லை என காரணம் காட்டி அமெரிக்காவின் பல்கலைகழகங்களில் படிக்க போனவர்களால் ஏற்பட்டது. அமெரிக்காவில் மட்டும் தான் மேற்படிப்பு படிக்க வாய்ப்பு இருப்பதை போல அங்கு போய் படிக்க பணக்கார, மேல் தட்டு வகுப்பை சார்ந்தவர்கள் குவிவது எந்த விதத்தில் நியாயம். அமெரிக்காவை விட படிப்பிற்க்கு ஏற்ற நாடு இந்தியா. இந்தியாவை விட அதிகமான போலி பல்கலைகழங்கள் அமெரிக்காவில் உள்ளன. அந்த போலி பல்கலை கழகங்களின் பிரச்சாரத்தை நம்பி போய் அங்கு படிக்க சேர்ந்து பாதிக்கப்பட்டுள்ளார்கள்.

அமெரிக்காவிற்கு படிக்க போக மற்றொரு காரணம், படித்து முடித்தவுடன் ஒரு நல்ல வேலையில் சேர்ந்து கிரின் கார்டு வாங்கி அங்கேயே செட்டில் ஆகிவிடலாம் என்ற எண்ணதில் தான் அங்கு போய் படிக்க குவிகிறார்கள். தற்போது அமெரிக்காவில் படித்து வரும் மாணவ சமுதாயத்தில் 100க்கு 70 சதவிதம் அதன் பகட்டை ரசிக்க, அங்கே செட்டில் ஆக வேண்டும் என போய் இருப்பவர்கள். மீதி 30 சதவிதத்தை சார்ந்தவர்கள் படிக்க போய் இருப்பவர்கள் என வைத்துக்கொண்டாலும் அவர்களில் படித்து முடித்து இந்தியா திரும்புவர்களின் எண்ணிக்கை 5 சதவிதம் கூட தாண்டாது. இவர்களுக்காக இந்திய மக்கள் ஏன் கவலைப்பட வேண்டும். இவர்களின் படிப்பு இந்தியாவுக்காக பயன்படும் என்றால் நாம் முண்டியடித்து போய் உதவி செய்யலாம் சின்ன துரும்பு அளவுக்கு கூட உதவி செய்ய தயாராக இல்லாத இவர்களுக்காக நாம் ஏன் உதவி செய்ய வேண்டும்.

இந்தியாவில் இருந்து வெளிநாடு போன இவர்கள் மட்டும் தான் பாதிக்கப்பட்டு உள்ளார்கள் என்பதை போல நாடகம் நடத்தும் வட இந்திய மீடியாக்களுக்கு ஒரு கேள்வி, வட மாநிலத்தை சார்ந்த மாணவர்கள், பொதுமக்கள், சினிமா பிரபலங்கள் வெளிநாடுகளில் பாதிக்கப்பட்டால் உடனே குதிக்கிறிர்கள். அந்திய தேசம் போய் வேலை செய்யும் போது சரியான விசா இல்லை என காரணம் காட்டி அந்நாட்டு காவல்துறையால் சிறைகளில் தள்ளப்பட்டுள்ள தமிழர்களை மீட்க இந்திய வெளியுறவுத்துறையும், இந்திய தூதரகங்களும் இதுவரை என்ன நடவடிக்கை எடுத்துள்ளது. இப்படி வேலைக்கு சென்று சிறையில் அடைக்கப்பட்டு உள்ளவர்களால் இந்தியாவின் மானம் போகவில்லையா?. அதுப்பற்றி நீங்கள் கூட ஏன் கேள்வி கேட்கவில்லை. சரியான விசா இல்லாமல் படிக்க போய் கண்காணிப்பில் வைக்கப்பட்டு உள்ளவர்களால் மானம் போனது என குதிப்பது என்ன நியாயம்.

இந்திய அரசே, மாணவர்களுக்காக குரல் கொடுப்பது சரியென்றால் பாதிக்கப்பட்ட தமிழக தொழிலாளர்களுக்காகவும் குரல் கொடுப்பது நியாயமாக இருக்குமே பின் ஏன் செய்வதில்லை. அட தூதரகங்கள் கூட ஒரு சிறு துறும்பு அளவுக்கு கூட தமிழர்களுக்கு உதவி செய்வதில்லையே ஏன்?. குரல் கொடுப்பது என்றால் அனைவருக்கும் குரல் கொடுக்க வேண்டும் ஆனால், இந்தியாவின் அனைத்து மாநிலங்களையும் ஆளும் நீங்கள் அதை செய்வதில்லையே ஏன்?. வட இந்தியர்களுக்கு மட்டும் தான் மானம், மரியாதை உள்ளது தமிழனுக்கு இல்லையா?.

இந்தியாவை ஆளும் அதிகார வர்க்கமே-வட இந்திய மீடியாக்களே, தென் தமிழக மீனவன் மீன் பிடிக்க போகிறவனை தினமும் சுட்டுக்கொல்வதும், நடு கடலில் நிர்வாணமாக சித்தரவதை செய்யும் சிங்கள ராணுவத்தை கண்டிக்க துப்புயில்லை, ஈழத்தமிழன் சுட்டுக்கொல்லப்பட்டபோது பாதுகாப்பு காரணம் காட்டி சிங்களனுக்கு ஆயுத உதவி செய்தவர்களே, வெளிநாட்டு சிறைகளில் துயரப்படும் தொழிலாள தமிழர்களை கண்டும் காணாமல் விட்டு வைத்துள்ள அரசே மானத்தை பற்றி பேசாதே. 



ஒரு கண்ணில் சுண்ணாம்பையும் மற்றொரு கண்ணில் வெண்ணையும் வைக்கும் நீங்கள் மானம் போய்விட்டது என அமெரிக்காவிடம் போய் குதிக்காதிர்கள். மானம், மரியாதை, மனித உரிமை என்பது எல்லாருக்குமே உண்டு. என்று இந்தியாவின் அனைத்து மாநில மக்களும் நம் மக்களே என எண்ணி குரல் கொடுக்கிறிர்களோ அன்று பேசுங்கள் மானம், மரியாதை, மனித உரிமை பற்றி அதுவரை பேசாதீர்கள்.