இலை மலர்ந்தால் ஈழம் மலரும்……மீண்டும் வருவார்கள் ஈழ வியாபாரிகள்.

நம்புங்கள் இலை மலர்ந்தால் நிச்சயம் ஈழம் மலரும். இது தான் தமிழ்தேசியவாதிகள் வரும் பாராளமன்ற தேர்தலின் போது வைக்கப்போகும் பிரச்சார வாக்கியம்.

சட்டமன்ற தேர்தலின் போது ‘தமிழர்களின் ஒட்டுமொத்த பிரதிநிதி பழ.நெடுமாறன், விடுதலைப்புலிகளின் புதிய செயல்தளபதி சீமான்’, ( தேர்தலை புறக்கணித்து வை.கோவும் மறைமுகமாக அதிமுகவுக்கு சாதகமாகவே செயல்பட்டார் ) போன்றோர் இலையை மலர வையுங்கள் ஈழம் நிச்சயம் மலரும் எனச்சொல்லி வாக்கு கேட்டார்கள். தமிழ்தேசியவாதிகள் உருவாக்கிய வாக்கியம் தான் அது. இலை மலர்ந்தது. மகிழ்ந்தார்கள் தமிழ் தேசியவாதிகள். சட்டமன்றத்தில் இலங்கை அதிபர் ராஜபக்சேவை திட்டியபோது ஈழம் கிடைத்துவிட்டது என பூரித்து போன தலைவர், தளபதிகள் ஜெவுக்கு ‘ஈழத்தாய்’ என பட்டம் தந்து பாராட்டினார்கள்.

இரண்டு ஆண்டுக்கு முன் நெடுமாறன், ஈழத்தாயின் தோழியான சசிகலாவின் கணவர் நடராஜன் மூலம் இலங்கையில் நடந்த ஈழ போருக்கு தமிழகத்தில் நினைவகம் அமைத்தார். அதற்கு பெயர் முற்றம். அதை அமைக்காமல் தடுத்தார் ஈழத்தாய். நெடுமாறன் வாய் திறக்கவில்லை. அமைதியாக இருந்தார். பின் மறைமுக தூதுவிட்டு எங்கள் அரசியல் இதில் தான் உள்ளது என சொல்லி மீண்டும் தடங்கல் வராமல் பணியை தொடங்கினார். இதற்கு செலவான தொகை நடராஜன் பணம் என்பது நாடறிந்த ரகசியம்.

கட்டி முடிக்கப்பட்ட முற்றம் 2013 நவம்பர் 8, 9, 10 தேதிகளில் திறக்கப்பட்டு நிகழ்வுகள் நடத்தப்படும் துரோகிகளுக்கு அழைப்பில்லை என்றார் நெடுமாறன். ஆனால் யாருக்கும் தெரியாமல் கடந்த 6ந்தேதியே முற்றத்தை திறந்துவிட்டார் நெடுமாறன். முற்றம் திறக்கவிடாமல் சிலர் முயற்சிக்கிறார்கள் அதனால் முன்கூட்டியே திறந்தோம் என அறிவித்தார். தடைபோடும் அந்த சிலர் யார் என்பதை அவர் மூச்சுவிடவில்லை. நெடுமாறன் அடிப்பொடிகளோ, மத்தியில் உள்ள காங்கிரஸ் அரசு என சொல்லிவருகிறது. அவர்கள் திட்டமிட்டு மறைப்பது அந்த சிலரில் ஜெ அரசும் உள்ளது என்பதை. ஜெ அரசு தான் நீதிமன்றம் மூலம் தடுக்க நினைத்தது. கொளத்தூர் மணி அவர்களை கைது செய்து மறைமுகமாக அதனை வெளிப்படுத்தி தங்களது நிலைப்பாட்டை காட்டியது. தமிழகத்தை ஆளும் ஈழத்தாய் நெருக்கடி தருவதால் தான் முன்கூட்டியே திறக்கப்பட்டது என்ற உண்மையை சொல்லாமல் காங்கிரஸ் அரசு பக்கம் கல்லை எறிகிறார்கள். அது தப்பல்ல. காங்கிரஸ்க்கு ஈழ படுகொலையில் மாபெரும் பங்குண்டு. அதேபோல் மத்திய காங்கிரஸ் சொல்வதை செயல்படுத்தும் ஜெ அரசுக்கும் பங்கு உண்டு தானே. அப்படியிருக்க ஜெ பெயரை சொல்லாமல் போவது ஏன் ?.

காரணம், பாராளமன்ற தேர்தல்.

பாராளமன்ற தேர்தலில் ஈழத்தாயை செங்கோட்டையை ஆள வைக்க துடிக்கிறார்கள் இந்த தமிழ்தேசியவாதிகள். தேர்தலில் தாயின் ஈழத்தாய் பிம்பம் உடைந்துவிடக்கூடாது. அதனால் தான் தடை போடும் தாயின் மறுப்பக்கத்தை மறைக்கிறார்கள்.

பிரச்சாரத்துக்கு வரும் அவர்களிடம் சட்டமன்ற தேர்தலின் போது, சட்டமன்ற தேர்தலின்போது இலை மலர்ந்தால் ஈழம் மலரும் என்றீர்கள். இலை தான் மலர்ந்ததே என நீங்கள் கேட்டால் அவர்கள் பதில், பிரச்சாரத்தை நீங்கள் முழுமையாக உள்வாங்கவில்லை. இலை மலர்ந்தால் ஈழம் மலரும் என்று சொன்னோம். தமிழகத்தில் தானே இலை மலர்ந்துள்ளது. இந்த இலை டெல்லியில் மலர வேண்டும். அப்போது தான் ஈழம் மலரும் அதனால் அம்மாவை பல்லக்கில் உட்கார வைத்து நாம் டெல்லிக்கு அனுப்பினால் அவர் பிரதமராகி இலங்கையை உடைத்து ஈழ நாட்டை பெற்று தருவார் என சொல்வார்கள். நெடுமாறன், வை.கோவுக்கும், சீமானுக்கும் பேச கற்று தர வேண்டுமாயென்ன ?. பொய்யை உண்மையாக பேசுவதில் வல்லவர்கள் அவர்கள்.

நீங்கள் அதை நம்பி வாக்களிக்க வேண்டும். அப்போது தான் நீங்கள் தமிழன் இல்லையேல் நீங்கள் துரோகிகள். இந்த தமிழ்தேசியவாதிகள் பாம்பு கொத்தாது என்றால் நீங்கள் நம்ப வேண்டும். மீறி கேள்வி கேட்டால் உங்களை துரோகிகளாக்கிவிடுவார்கள்.

2009ல் ஈழத்தில் போர் நடந்தபோது உலகநாடுகள் ஈழ தமிழனத்துக்கு துரோகம் செய்தபோல தமிழகத்தில் நடமாடும் இன்றளவும் நாங்களே பிரதிநிதிகள் என அறைகூவல் விடுக்கும் பழ.நெடுமாறன், வை.கோ போன்றவர்களுக்கு பெரும் பங்குண்டு. ஆனால் அதை தங்களது வாய்பேச்சு, ஊடகங்கள் மூலமாக திசை திருப்பினார்கள். திமுக அதற்காக காப்பாற்ற போராடியது என அர்த்தமல்ல. மாநில கட்சிகளால் எந்தளவுக்கு இந்த விவகாரத்தில் செயல்பட முடியும் என்பது அரசியலில் கொட்டை போட்ட நெடுமாறன், வை.கோ போன்றவர்களுக்கு தெரியாததல்ல. ஆனாலும் திமுகவை குற்றம் சாட்டினார்கள்.

அவர்களின் நோக்கம் நியாயமாக, ஈழ மக்களுக்காக சிந்திப்பதல்ல. ஈழ பினங்களின் மீது அரசியல் செய்து தங்களுக்கு தோதான அதிமுக மலர வேண்டும் திமுகவை அரசியல் களத்தில் இருந்து அப்புறப்படுத்த வேண்டும் என்ற வேட்கை தான் காரணம். அதை செய்தார்கள். வென்றார்கள். அதனால் தான் ஜெ அரசு தற்போது நுணுக்கமாக ஈழ தமிழனத்துக்கு எதிராக பல பிரச்சனைகள் செய்தாலும் அதை கண்டும் காணாமல் இருக்கிறார்கள் தமிழ்தேசியவாதிகள்.


அவர்கள் தான் மக்களை சந்திக்க மீண்டும் வரப்போகிறார்கள். இலை மலர்ந்தால் ஈழம் மலரும். அந்த இலை டெல்லியில் மலர வேண்டும். அம்மா பிரதமராக வேண்டும் என கேட்கபோகிறார்கள்.

ஒருவேளை அம்மா பிரதமாராகி ஈழத்தாயை பாரததாய் என வர்ணிக்கும் இந்த நெடுமாறன், வை.கோ, சீமான் வகையறாக்களிடம் ஏன் இன்னும் ஈழம் மலரவில்லையென நீங்கள் கேட்டீர்கள் என்றால், அதற்கு உலக நாடுகளின் ஆதரவு தேவை அதனால் ஐ.நா சபை செயலாளராக பாரத தாயின் போர் படை தளபதி அண்ணன் ஓ.பி.எஸ் சை ஐ.நா சபை செயலாளராக்க அம்மா முடிவு செய்துள்ளார். அவர் ஐ.நா சபை செயலாளரானதும் ஈழம் மலர்ந்துவிடும் என்பார்கள் நாம் கை தட்டி வரவேற்க வேண்டும். இல்லையேல் நீங்கள் தமிழன துரோகிகள் என முத்திரை குத்தப்படுவீர்கள்.

பார்வையாளனை கடித்து குதறிய ஓநாய் ........

மிஷ்கினின் ஓநாயும் ஆட்டுக்குட்டியும் படத்துக்கு தரப்பட்ட அதீத விமர்சனம்மே அந்த படத்தை பார்க்கும் ஆசையை அடக்கிவிட்டது. இன்று  விஜய் டிவியில் பார்க்கும் வாய்ப்பு கிடைத்தது. ஒரு படத்தை லாஜிக்கே  இல்லாமல் அறிமுக இயக்குநர்கள் கூட தற்போது எடுப்பதில்லை என்பதே என் கருத்து. 

மிஷ்கின் கல்லறையில் குழந்தைக்கு கதை சொல்லுவது படத்தின் மாஸ்டர் பீஸ் என வர்ணித்திருந்தார்கள். அந்த கதை நன்றாக இருந்ததே தவிர கதை சொல்லப்படும் போது பார்வையாளன் மனதில் ஒரு பெரும் தாக்கத்தை ஏற்படுத்தவில்லை. அந்த காட்சியில் உணர்ச்சியும்மில்லை. கண் தெரியாமல் நடித்தவர்கள் இயந்திரம் போலவே நடித்தார்கள் என்பதே உண்மை. எந்த இடத்திலும் படத்தோடு ஒன்ற முடியவில்லை. 

படத்தில் இளையராஜாவின் இசையை ஆஹோ ஓஹோ என புகழ்ந்தார்கள். இந்த படத்தில் எதற்காக இப்படியொரு பின்னணி இசை என்பதை படத்தை பார்த்த என்னால் புரிந்துக்கொள்ள முடியவில்லை. இளையராஜா மிஷ்கினை பழிவாங்கினாரா? இல்லை இசையை பழிவாங்கினாரா? என்பதை அவருக்கே வெளிச்சம்.

இதே படத்தை வேறு யாராவது எடுத்திருந்தால் துவைத்து தொங்கவிட்டுயிருப்பார்கள் சில விமர்சகர்கள். வேறு சிலர் முகநூலில், பிளாக்கில் எழுதிய விமர்சனம் நிச்சயம் படத்துக்கானதில்லை. அவர்களின் நண்பன் மிஷ்கினுக்கானது என்பதை இப்போது உணரமுடிந்தது. நண்பனுக்காக ஆஹா ஓஹோ என புகழ்ந்துவிட்டார்கள். 

இதை கேட்டு நாம் உலகளாவிய படத்தை எடுத்துவிட்டோம் என நம்பியே என்னவோ மிஷ்கினும் தான் சினிமாவை காக்க வந்த ரட்சகர் போல் பேச தொடங்கிவிட்டார். அவர் மட்டுமல்ல பல இயக்குநர்கள் அப்படித்தான் பேசுகிறார்கள். இதுபோன்ற புகழ்ச்சிக்கு பலியானவர்கள் தான் மணிரத்னம், சேரன், ராம் போன்றவர்கள். சினிமாவை யாரும் காப்பாற்ற தேவையில்லை. சினிமா மூலம் உங்களை காப்பாற்றிக்கொள்ளுங்கள். 

மிஷ்கின் இலக்கியம், சினிமா இரண்டு தளத்தில் இயங்க ஆசைப்படுகிறார். அதில் தப்பில்லை. ஆனால் இரண்டையும் போட்டு குழப்பிக்கொண்டு படம் எடுப்பது தான் தவறு. 

இலக்கியம் என்பது பாமர ரசிகனுக்கு என்றும் புரிந்ததில்லை. இலக்கியவாதிகள் புரியவைப்பதும்மில்லை. புரியாமல் படத்தையும் எடுத்தால் எப்படி சரியாக இருக்கும். சினிமா பார்க்க வரும் ரசிகனுக்கு குழப்பமான இலக்கிய கதை தேவையில்லை. ஜாலியான ரசிக்கும் தன்மையுடைய சினிமாவே தேவை. 

மாற்று சினிமா என பேசி அவன் கழுத்தை அறுக்காமல் இருந்தால் போதுமானது. மாற்று சினிமாவுக்கான களம் தமிழகம் இல்லை என்பதை முதலில் உணர்ந்துக்கொள்ள வேண்டும். அதற்கு ஏற்றாற்போல் படம் எடுத்தால் ரசிகர்கள் ரசிப்பார்கள். 

மிஷ்கின் சரியாக தான் படத்துக்கு தலைப்பு வைத்திருந்தார். ஓநாயிடம் சிக்கிய ஆட்டுக்குட்டியாகி போயிருப்பார்கள் ரசிகர்கள். 

விஜய் டிவிக்கு நன்றி. (அடிக்கடி விளம்பரம் போட்டு ஓநாயிடம் இருந்து தப்ப வைத்ததற்க்கு)

கொள்ளையடிக்கும் ஹோட்டல்கள் .........

நீண்ட நாட்களாக மனதில் இருந்த விஷயம் திருவண்ணாமலை ஹோட்டல்கள் பற்றி எழுத வேண்டும் என்பது. ஆனால் அது தள்ளி தள்ளி போய்க்கொண்டேயிருந்தது. முகநூலில் இயங்கும் திருவண்ணாமலையை சேர்ந்த ரவீந்திரன் என்பவர் கிருஷ்ணகிரியில் உள்ள ஷீபா ரெஸ்டாரென்ட்டோடு திருவண்ணாமலையில் உள்ள ஸ்டார் பிரியாணி ஹோட்டலை ஒப்பிட்டு எழுதி நீண்ட நாட்களாக என் மனதில் உள்ள விஷயத்தை எழுத வைத்துவிட்டார்.

நான் ஊர் சுற்றும் புறா. வாரத்தில் நான்கு நாள் வேலை நிமித்தமாக பயணித்துக்கொண்டே இருப்பேன். கடந்த 10 வருடங்களாக பயணம் செய்துக்கொண்டே இருக்கிறேன். அதில், மதிய உணவு வீட்டில் உண்ட நாட்களை எண்ணிவிடலாம். பல நாட்கள் காலை அ இரவு உணவு கூட ஹோட்டல் தான். திருவண்ணாமலை, வேலூர் மாவட்டத்தில் நான் சாப்பிடாத ஹோட்டல் மிக மிக குறைவு. பெரிய ஹோட்டல் முதல் கையேந்திபவன் வரை எதுவாக இருந்தாலும் உணவு ருசியாக இருந்தால் அந்த ஹோட்டலை பற்றி ‘மார்க்கெட்டிங்’ செய்ய தொடங்கிவிடுவேன். மாதத்தின் முதல் வாரம் ஸ்பார்சா என்றால் மாத கடைசியில் கையேந்திபவன். ஸ்பார்சா முதல் சில கையேந்திபவன் வரை நானும் சில நண்பர்களும் வாடிக்கையாளர்கள்.

நீண்ட ஆண்டுகளாக ஹோட்டல்கள் வளர்ச்சி, உணவின் தரம், விலை உயர்வு எப்படி என்பதை அறிந்து வருகிறேன். தற்போது திருவண்ணாமலையில் உள்ள ஹோட்டல்களில் சாப்பிட உட்கார்ந்தால் அய்யோ பட்டினியாக இருந்து விடலாம் என நினைக்கும் அளவுக்கு விலை உயர்ந்துள்ளது. உயர்ந்துள்ளது என்பதை விட உயர்த்தியுள்ளார்கள்.

நடுத்தர வசதிகள் கொண்ட திருவண்ணாமலையில் பெரு நகரங்களைவிட அதிகமாக உணவுகளின் விலையை உயர்த்தியது. ஹோட்டல் கண்ணா குழுமம். சில ஆண்டுகளுக்கு முன் தொடங்கப்பட்ட இந்த ஹோட்டலில் விதவிதமான உணவுகள் அறிமுகப்படுத்தப்பட்டன. அதோடு, உணவு ருசியாக இருந்தது என நிறைய வாடிக்கையாளர்கள் வாடிக்கையாக சென்றனர். ஹோட்டலை அலங்காரம் செய்த முதலாளிகள் அலங்காரத்தை காட்டி உணவு பொருட்களின் விலையை உயர்த்தினர். விலை ஏற்றம் பின் படிப்படியாக உயர்ந்தது. இந்த ஹோட்டலை பார்த்துவிட்டு நளா, அபிராமி, ஆகாஷ், தீபம், பாலாஜிபவன் போன்ற மற்ற ஹோட்டல்களும் விலையை உயர்த்தின. இதற்கு அடுத்த நிலையில் உள்ள ஹோட்டல்களும் விலையை உயர்த்தின. உணவின் தரத்தை உயர்த்தாமல் விலையை மட்டும் உயர்த்தினார்கள் என்பதை குறிப்பிட்டே ஆக வேண்டும்.

தற்போது திருவண்ணாமலை நகரத்தில் உள்ள ஹோட்டல்களில் உள்ள விலை பட்டியலோடு வேலூர் மாநகரத்தில் உள்ள ஹோட்டல்களின் விலையுடனோ அல்லது விழுப்புரம், பாண்டிச்சேரி, பெங்களுரூவில் உள்ள நடுத்தர ஹோட்டல்களின் விலையோடு ஒப்பிட்டால் பஸ் ஏறிப்போய் இதில் ஏதாவது ஒரு ஊரில் குடும்பத்தோடு சாப்பிட்டுவிட்டு வந்துவிடலாம் என்ற அளவில் உள்ளது. மேலே குறிப்பிட்ட சைவ உணவு ஹோட்டல்களில் மட்டுமல்ல அசைவ உணவு ஹோட்டல்களிலும் இதே நிலை தான்.

திருவண்ணாமலை அசைவ பிரியர்கள் ஸ்டார் ஹோட்டல் பிரியாணியை ஆஹா, ஓஹோ என புகழ்வார்கள். (வாணியம்பாடி காஜா ரெஸ்டாரென்ட், ஆம்பூர் ஸ்டார் ஹோட்டல், வேலூர் அம்மா பிரியாணி, பாண்டிச்சேரி காமாட்சி குழுமம், செட்டிநாடு, விழுப்புரம் பேருந்து நிலையம் எதிரே உள்ள ஒரு ஹோட்டலில் சாப்பிட்டவர்கள் திருவண்ணாமலை ஸ்டார் பிரியாணியை புளி சாதம் என்பார்கள்). ஸ்டார் ஹோட்டலில் சொல்லப்படும் விலையை கேட்டால் பிர்லாவுக்கே பேதியாகிவிடும். ஸ்டாரை போலத்தான் நளாவிலும். இவர்கள் பணத்தை புடுங்குவதில் குறியாக உள்ளார்களே தவிர வாடிக்கையாளர்களை திருப்திப்படுத்தும் எண்ணம்மேயில்லை.

மேலே குறிப்பிட்ட சைவ, அசைவ ஹோட்டல்கள் மட்டுமல்ல பெரிய ஹோட்டல்களாக உள்ள ராமகிருஷ்ணா, திரிசூல், ஸ்பார்சா, அபர்ணா, (இப்போதைக்கு பெரிய ஹோட்டல்) உட்பட இவர்கள் யாருக்கும் வாடிக்கையாளர்களை தக்க வைத்துக்கொள்ள வேண்டும் என்ற எண்ணம்மில்லை. பணம் சம்பாதிக்க வேண்டும் அவ்வளவே. விருப்பத்துக்கு ஏற்றாற்போல் விலை. பௌர்ணமி நாட்களில் இவர்கள் வைப்பது தான் விலை. விலை பட்டியல் ஒன்றிரண்டு ஹோட்டல்களை தவிர வேறு எந்த ஹோட்டலிலும் கிடையாது. வெளியூர்க்காரர்கள் கோயிலுக்கு வந்தால் அவன் இனிமேல் ஹோட்டலில் சாப்பிடவே கூடாது என நினைக்கும் அளவுக்கு பர்சை காலியாக்கும் வித்தை தெரிந்தவர்கள் திருவண்ணாமலை ஹோட்டல்காரர்கள்.

ஏமாற்றுபவர்கள், கொள்ளைக்காரர்கள், மக்களை முட்டாளாக நடத்தியவர்களை திருவண்ணாமலை மக்கள் எப்படி புறக்கணித்துள்ளார்கள் என்பதற்கு சாட்சியங்கள் உருவாகியுள்ளன. திருவண்ணாமலையில் கோலோச்சிய நகை கடைகள், துணிக்கடைகள் எல்லாம் இப்போது காற்றாட துவங்கிவிட்டன. காரணம், மக்களின் ரசனை, அவர்கள் மீதான வெறுப்பு போன்றவை மனதில் இருந்தன. இந்தியா முழுக்க கிளை வைத்திருக்கும் ஜிவல்லரிகள், தமிழகம் முழுக்க கிளை வைத்திருக்கும் துணி கடைகள் திருவண்ணாமலைக்கு வந்ததும் மக்கள் அப்படியே அங்கு செல்ல துவங்கிவிட்டனர். தரத்துக்கு ஏற்ற விலை என்பதை அறிந்தனர். வாடிக்கையாளர்களின் நலனில் அக்கறை கொள்ளும் பிரபல ஹோட்டல்கள் திருவண்ணாமலையில் கிளை வைத்தால் நிச்சயம் உணவின் தரத்திலும், விலையிலும் ஒரு மாற்றம் வரும். மக்களை ஏமாற்றும் இது போன்ற ஹோட்டல்கள் புறக்கணிக்கப்படும்.