பாலாவை மன்னிக்கமாட்டார் பாலுமகேந்திரா.

ஈழ மண் சினிமாவுக்கு தந்த பிள்ளை பாலுமகேந்திரா. (பாலநாதன் பெஞ்சமின் மகேந்திரா) ஈழத்தின் மட்டகளப்பில் பிறந்து புனோவில் ஒளிப்பதிவு துறையில் பட்டம் பெற்றவர் முதன் முதலில் ஒளிப்பதிவு செய்தது ஒரு மலையாளப்படம். 1972ல் ஒளிப்பதிவை தொடங்கினார். முதல் படம் நெல்லு ஒளிப்பதிவுக்கான மலையாள அரசின் விருதை பெற்று தந்தது. 1977வரை ஒளி கவிஞராக மட்டும் வலம் வந்தவர் 1977ல் கோகிலா என்ற கன்னடப்படத்தை இயக்கி இயக்குநராக பரிணாமித்தார். இலக்கியவாதிகளின் கனவு பிம்பம் பாலுமகேந்திரா தான். 99 சதவிதம் நாவல்களை படமாக்குபவர்கள் தோற்று போவார்கள் ஆனால் வெற்றி படம்மாக தந்தவர் பாலுமகேந்திரா. திரைக்கதை வடிவில் வெற்றி என்றாலும் வசூல் ரீதியாக தோல்வி படமாகத்தான் இருக்கும். இருந்தும் தன்னை மாற்றிக்கொள்ளாத சமரசம் செய்துக்கொள்ளாத இயக்குநர் - ஒளிப்பதிவாளர். யாரிடமும் உதவியாளராக இருந்ததில்லை.

1977 முதல் 2013 வரை 46 வருடங்களில் 26 படங்கள் தான் இயக்கியுள்ளார். ஒளிப்பதிவு செய்த படங்கள் 28. ஐந்து முறை தேசிய விருது. கன்னட, மலையாள, தமிழ் மாநில அரசுகளின் விருதுகள் என பல பெற்றுள்ளார். ஒரு படத்துக்கு எடிட்டிங்காகவும் தேசிய விருது பெற்றுள்ளார்.

இப்படிப்பட்ட சாதனை மனிதரின் மறைவில் சர்ச்சையை உருவாக்கிவிட்டார் இயக்குநர் பாலா.

ஓன்றுக்கு மேற்பட்ட மனைவிகள் இருக்கும் குடும்பத்தில் கணவன் இறந்த பின் நடக்கும் தகராறு தான் பாலுமகேந்திரா இறப்பின் போதும் நடந்துள்ளது. பாலுமகேந்திராவுக்கு மூன்று மனைவிகள். ஒருவர் அகிலா. இந்த தம்பதிக்கு ஒரு மகன் உண்டு. இரண்டாவது மனைவி நடிகை ஷோபா. அவர் தற்கொலைக்கு பின் மூன்றாவதாக திருமணம் செய்துக்கொண்டது நடிகை மௌனிகாவை. வண்ண வண்ண பூக்கள் என்ற படத்தில் மௌனிகாவை அறிமுகப்படுத்தியது பாலுமகேந்திரா. இயக்குநர் – நடிகை என்ற பந்தத்தை தாண்டி இருவரும் கணவன் - மனைவியாக வாழ தொடங்கினர். சுமார் 10 ஆண்டுகளுக்கும் மேலாக அப்படி வாழ்ந்தவர்கள் 1998ல் முறைப்படி திருமணம் செய்துக்கொண்டு தம்பதியாகியுள்ளனர். இதை பாலுமகேந்திராவே 2000ல் வெளிப்படையாக ஒப்புக்கொண்ட விவகாரம்.

பாலுமகேந்திரா உடல்நிலை சரியில்லாமல் விஜயா மருத்துவமனைக்கு கொண்டு சென்ற தகவல் கேள்விப்பட்டு மௌனிகா பார்க்க செல்ல முயன்ற போதும், அவர் இறந்த தகவல் கிடைத்தபோது தன் கணவரை பார்க்க மௌனிகா பார்க்க முயன்றபோதும், அவள் வந்தால் நடப்பதே வேறு என இயக்குநர் பாலா மிரட்டியதாக கூறப்படுகிறது. இது நடக்காமல் செய்திருக்க முடியும் ஆனால் தன் விசுவாசத்தை அம்மா என அழைக்கும் அகிலாம்மாவிடம் காட்ட தேவையில்லாமல் பாலா இதை சர்ச்சையாக்கியுள்ளார்.

முதல் மனைவிக்கு எவ்வளவு உரிமை உள்ளதோ அதே உரிமை இரண்டாவது மனைவிக்கும் உள்ளது என்கிறது சட்டம். ஆனால் இயக்குநர் பாலா தன் குருவின் முதல் மனைவியிடம் காட்டிய பக்தி கலந்த மரியாதையை இரண்டாவது மனைவியிடம் காட்டவில்லை. இயக்குநர் பாலா அவரது மாணவர் தான் மறுக்க முடியாது. ஆனால் அதை விட முக்கியம் மௌனிகா பாலுமகேந்திராவின் மனைவி. இதை மாற்ற முடியாது. பாலாவை விட மௌனிகாவுக்கு தான் அதிக உரிமை. அப்படியிருக்க இறந்த கணவரை மனைவி பார்க்க வரக்கூடாது என தடுக்க ஒரு மாணவருக்கு எந்த உரிமையும் கிடையாது. தன் கணவர் இறந்துப்போனதை காதல் திருமணம் செய்துக்கொண்ட ஒரு மனைவியால் எப்படி தாங்கிக்கொள்ள முடியும். எந்த பெண்ணாலும் தாங்கிக்கொள்ள முடியாது. இது அறியாத முட்டாளா பாலா.

பாலா தடுக்கிறார் என்றதும் பாலுமகேந்திராவின் மாணவர்களாக இருந்து இயக்குநாராகியுள்ளவர்கள் பாலாவிடம் எதிர்த்து கேட்கவில்லை, மௌனிகாவின் உரிமையை நிலை நாட்ட முயலவில்லை. மற்ற இயக்குநர்களும் அமைதி காத்துவிட்டனர். ஏன் எனில் பாலா பெரிய இயக்குநர். பெரிய இயக்குநராக இருந்து என்ன புரியோஜனம். ஒரு பெண்ணின் உணர்வுகளை மதிக்க தெரியாதவர்யெல்லாம் பெரிய இயக்குநரா?. எம் பார்வையில் அவர் சராசரி மனிதர் கூட கிடையாது.

தன்னை வரக்கூடாது என மிரட்டுகிறார்கள் என மௌனிகா பேசியபின் அது சர்ச்சையானது. அதன்பின் ஒரு சில மூத்த இயக்குநர்கள் சமாதானம் பேசி மௌனிகா அஞ்சலி செலுத்த மட்டும் அனுமதி வாங்கி தந்துள்ளனர். மௌனிகா தன்னால் பிரச்சனை வரக்கூடாது தன் கணவர் இறப்பு சர்ச்சையாகிவிடக்கூடாது என்பதற்காக தன் கணவரின் முகத்தை பார்த்து சில நிமிடங்கள் அழுதுவிட்டு அங்கிருந்து அழுதபடியே சென்றுள்ளார்.

பாலா, ராம், வெற்றிமாறன், சுகா போன்ற பல நல்ல திரை படைப்பாளிகளை உருவாக்கியுள்ளார் பாலுமகேந்திரா. நல்ல மனிதர்களை உருவாக்கியுள்ளாரா என்ற கேள்விக்கு பாலுமகேந்திரா பதில் சொல்லவில்லை. அவரின் திரைவாரிசுகளில் ஒருவரும், செல்லப்பிள்ளையுமான இயக்குநர் பாலா தெரிவித்துவிட்டார்.

இது குருவுக்கு சிஷ்யர்(கள்) செய்த துரோகமாகவே பார்க்கப்படும். வானில் நட்சத்திரமாக ஜொலிக்கும் பாலுமகேந்திரா நிச்சயம் பாலாவை மன்னிக்கமாட்டார்.